Newyddion

Mae Agored Cymru a Gwasanaeth Addysg a Gwella Iechyd Cymru (HEIW) yn falch iawn o fod wedi ennill Gwobr Perthynas Corff Dyfarnu/Cyflogwr y flwyddyn yng Ngwobrau mawreddog Ffederasiwn y Cyrff Dyfarnu (FAB) 2024. Mae’r wobr hon yn cydnabod partneriaeth sydd wedi arwain y ffordd wrth drawsnewid hyfforddiant a datblygiad y gweithlu ar draws GIG Cymru.

Perthynas wedi’i Sefydlu ar Ragoriaeth

Ers 2017, mae Agored Cymru a HEIW wedi cydweithio’n agos i gyflwyno cymwysterau o safon uchel, wedi’u teilwra’n arbennig ar gyfer staff y GIG. Aeth y bartneriaeth hon gam ymhellach yn 2020 pan ddyfarnwyd y contract i Agored Cymru i ddatblygu cymwysterau galwedigaethol ar gyfer GIG Cymru hyd at 2030. Gyda’n gilydd, rydym wedi datblygu dros 40 o gymwysterau sy’n cwmpasu rolau clinigol ac anghlinigol, gan gynnwys rhaglenni arloesol sy’n mynd i’r afael â bylchau mewn gweithlu mewn meysydd fel endosgopi a ffotograffiaeth glinigol.

Llwyddiant ac Arloesedd

Mae’r wobr hon yn tynnu sylw at sut mae ein cydweithrediad wedi cyflawni atebion arloesol, gan gynnwys:

• Cymwysterau wedi’u teilwra - Rhaglenni sy’n ymateb i brinder sgiliau uniongyrchol ac anghenion iechyd sy’n dod i’r amlwg.
• Grymuso’r gweithlu - Mentrau hyfforddi i wella sgiliau staff y GIG mewn asesu a sicrhau ansawdd, gan sicrhau amgylchedd dysgu cadarn ar draws Cymru.
• Ymateb i’r pandemig - Datblygu cymwysterau hanfodol yn gyflym, megis pecynnau imiwneiddio ar gyfer Gweithwyr Cefnogi Gofal Iechyd yn ystod COVID-19.

Cydnabod yr Effaith

Mae ein partneriaeth wedi gwneud gwahaniaeth sylweddol:

• 1,500 o unedau sefydlu wedi’u dyfarnu i staff clinigol newydd, gan sicrhau bod gofal diogel ac effeithiol yn cael ei gyflwyno.
• 300+ o gofrestriadau ar gyfer cymwysterau Cefnogi Gofal Iechyd Clinigol a 100+ ar gyfer Gwasanaethau Cyfleusterau yn y 12 mis diwethaf.
• Cyfleoedd datblygu gyrfa wedi’u gwella a chynaliadwyedd gweithlu wedi’i gryfhau drwy gyllid prentisiaethau a llwybrau cymhwyster arloesol.

Fformiwla sy'n Ennill

Mae’r wobr hon yn tanlinellu cryfder ein partneriaeth, sydd bellach yn batrwm ar gyfer cydweithrediadau effeithiol mewn addysg a hyfforddiant. Drwy gyfuno arbenigedd gofal iechyd HEIW gydag arbenigedd Agored Cymru mewn datblygu cymwysterau, rydym yn parhau i ddarparu atebion hyfforddi sy’n berthnasol ac yn flaengar sy’n diwallu anghenion GIG Cymru.

Rydym yn falch iawn o rannu’r gydnabyddiaeth hon gyda HEIW ac yn parhau i fod yn ymrwymedig i gefnogi’r GIG a’i weithlu gyda rhagoriaeth, arloesedd ac un weledigaeth ar gyfer system gofal iechyd medrus a gwydn.